 |
| 薩拉熱窩今貌，可見街道寬闊整潔 |
近嚟心緒不寧，腦海中成日出現民初某位詩人嘅詩句：「近來心事亂如麻，想起國事XXX」，胡思亂想中，竟然浮現左旅遊薩拉熱窩(Sarajevo)嘅畫面。
薩拉熱窩雖然唔係歐洲一線城市，但佢嘅名氣唔細，城市整潔，環境優美，輮合左基督教同伊斯蘭教嘅文化；呢座城市亦背負左沉重嘅歷史包袱，1914年奧匈帝國皇儲斐迪南夫婦在薩城被塞爾維亞刺客所殺，結果引致第一次世界大戰。
 |
| 斐迪南夫婦被暗殺嘅拉丁橋 |
二次大戰後南斯拉夫聯邦成立，薩拉熱窩屬南斯拉夫聯邦中波斯尼亞共和國嘅首府。1984年薩市主辦冬奧，係薩拉熱窩最風光嘅一刻，世人認識到東歐有一座咁美麗嘅城市，當地人亦以舉辦冬奧為榮。可惜好景不常，1992年前南斯拉夫爆發內戰，塞爾維亞武裝分子為左維持一個大一統嘅南斯拉夫，對其他族群如克羅地亞族和回教徒無差別攻擊，居於薩拉熱窩嘅主要係回教徒，佢地奮起還擊，雖然武力唔對等(塞族部隊擁有蘇式精良武器，回教徒只有槍枝)，薩拉熱窩被塞族部隊四面圍城，居民幾乎彈盡良絕但仍苦苦支撐四年。1996年南斯拉夫各族和解，結果係南斯拉夫分裂成六國，薩拉熱窩現成為波斯尼亞嘅首都。
內戰雖然已結束左廿幾年，但戰爭嘅痕跡仍隨處可見，市內唔少建築物仍留低子彈窿或炮孔。筆者印象最深係冬奧雪橇賽道，彎彎嘅賽道已成頹垣敗瓦，周圍雜草叢生，較完整嘅噴滿塗鴉。筆者同友人在賽道上遊走，擺出唔同姿勢留念，興奮過後卻湧上一陣荒涼嘅感覺：原來毀滅一座城市，係咁輕而易舉嘅事。
 |
| 冬奧遺跡 |
毀滅一座城市其實唔難，只要有兩種天下無敵嘅武器就成：愚蠢同專制。當年塞族好戰份子唔係愚蠢到以為武力可解決一切，又點會生靈塗炭？南斯拉夫政府唔係迷信一黨專權係靈丹妙藥，又點會令這座城市毀滅呢？
大家不妨對號入座，看看東方某座大城市如何走入毀滅之路！
文、圖：多羅羅
#薩拉熱窩
#南斯拉夫內戰
#1984冬奧
請到二喬工作室面書讚好此文：
二喬工作室，提供不同類型文字，助你增廣見識，擴闊眼界：
DSE中國語文應試路路通http://2kiu-workshop.blogspot.hk/
二喬通識閱讀http://2kiu-ls.blogspot.hk/
沒有留言:
張貼留言